Сага анатоми
Сага анато́ми (я) (ш.-ян. ἀνατομή — доаттӀадар, эттӀадар) — сага дегӀа, цун системийи маьженийи, морфологи тохкаш дола биологен да́къа. Сага анатомен тохкама предмет я дегӀ хьахилар а, из дегӀада́р а, цун куцаш а лоаттам а. Сага анатоми биологени лорий дешара́и кӀийленна южача дисциплинех я, иштта шийх хьаяьннача дисциплинашца ма хулла ювзаенна из: антропологецеи, сага физиологецеи, иштта дустара анатомецеи, эволюце хьехамцеи, генетикацеи. Сага анатоми кхыча дийнача дегӀамий анатомех хьакъоастаяй, хӀана аьлча сагага къаьстта анатомен белгалонаш хиларал совгӀа цунга кхетами, хьаькъали да, къамаьл де а мог цунна.
«ЛерттӀача» (унахцӀена долча) дегӀа анатоми маьжений системашца тохк — лерттӀа (систематикаца йола) сага анатоми. Из доацаш, сага анатоме ларда тӀа, хирургий поалхам тӀакхетарца, топографе анатоми яха дисциплина хьахиннай. Цо дегӀа оттам дукхагӀа цхьа моттиг хьа а лувцаш тохк, системашца ца тохкаш. Маьженаш цаӀ-шоллагӀчунга хьежжа мишта я́да Ӏомаду цар.
Лорий Ӏилма гаьнагӀа мел доалла, маьжений къаьстта уне дола хьалаш тохка керда Ӏилма отташ да, цунах патологе анатоми оал.