Кавказдехье

Кавка́здехье́ (эрс: Закавказье, эрм. Անդրկովկաս, гӀозл. Cənubi Qafqaz, гурж. სამხრეთი კავკასია), е ЗӀилбухе́ра Кавка́з — Малхбоалерча Европанни Хьалхарча Азенни гӀай а деш, Кавказа дакъа дола геополитикай регион я. Йоккхача Кавказа Кертерча е Хий къоастадеча дукъа зӀилбухехьа улл Кавказдехье.

Кавказдехье лоархӀ Йоккхача Кавказа зӀилбухерча босений доккхагӀа долча даькъах а, Колхидах а, Курай таьӀача моттигах а, ЗӀамигача Кавказах а, Эрмалой лоамен гӀинбухе-малхбоалерча даькъах а, Талыша лоамех а. Кавказдехьен доазона тӀа Эрмалойчеи, ГӀозлойчеи Гуржехьеи улл. Цул совгӀа Кавказдехьа я́д цхьан даькъе тӀаийца паччахьалкхенаш а: Эрсечеи цхьацца кхыйолча паччахьалкхенаши тӀаийца йола Абхазой республикаи, ЗӀилбухера ХӀирийчеи, иштта цхьанне а тӀаийца йоаца Арцахе Республикаи. Кавказдехьен доазув гӀинбухехьа Россе Федерацеца да, зӀилбухехьа — Туркий мехкацеи ХӀиранацеи, малхбузехьа Ӏаьржа форд ба, малхбоалехьа Къаспий форд ба. Кавказдехьен майда 190 эзар кв.км я.